Dubai Haul: مشترياتي من دبي

السلام عليكم ورحمة الله وبركاته

قبل شهر أبوي الله يحفظه قرر فجأة نسافر معاه دبي، هو كان رايح شغل وقال لنا: تجون؟ طبعا ماكان فيه مجال للنقاش، أختكم الكريمة جهزت شنطتها وسحبت على الجامعة كم يوم، وفي أول ثلاثا في الشهر طارت طيارتنا ووصلنا لدبي بالسلامة.

قبل مانسافر بأسبوع كنت أقول لأمي: ماما هالمرة أنا مب ناقصني ولاشي، خلاص مب مسوية شوبنق

لكن على مين؟ في حد ممكن يشوف دبي مول وماتحكه يده يفرفر فيه ويشتري كل شي؟ :p

في هالأسبوع، فضيت بيوم وقررت أدور في البلوقات وجاتني فكرة إن كل ما يعجبني شي أحطه في "To-buy list"، عشان إذا شفته في مكان آخذه على طول، وتميت قريب الـ ٦ ساعات أزيد في اللستة لين وصلت فوق الـ  ٣٠ شي، قلت خلاص عاد بوقف .. ووقت الشوبنق حصلت بعض الأشيا وبعضها قالولي بحصلهم في كارفور وغيرها لكن تعيجزت فبطلبهم من أمزون!

يوم السبت رجعنا فليل، وقلت دام إني برتب أغراضي خلني أصور مرة وحدة للبلوق.. وكنت جد تعبانة فـ ماعليكم من الصور اللي طرف السرير يبين منها وغيره لأنه ماكان لي خلق :( وبعض الأشيا ماصورتها مثل الملابس وغيرها لأن حبيباتي ربعي يعرفون بلوقي فمابيهم يشوفونه عقب ماقدر ألبسه عندهم :p



ماشاءلله، تبارك الله، لاقوة إلا بالله.

دخلت المحل وأنا في بالي آخذ clutch حق زيارات صديقاتي، وأكثر واحد كان في خاطري هو الكلتج الشفاف، لكن ماحصلت اللي عجبني .. قلت خلاص دام جيه باخذ لفة صوب الجواتي وبشوف لو عندهم شي يناسب الجامعة. لكن أنا أقول شي وآخذ شي ثاني للأسف

Charlotte Olympia

أول ماشافه أبوي شهق من الصدمة: كعب هالطول؟ ليش؟

أكثر شي يكرهه أبوي هو الكعب :( دايماً يقولي مب زين للظهر وبتطيحين ولا تلبسين كعب وايد طويل، لكن شسوي والله! القصر مأزمني ولازم أشتري أطول كعب فالمحل :p هالكعب حسيت ممكن يناسب العزايم الكبيرة والمناسبات.

 Giuseppe Zanotti 

لحد يتطنز عليه :( أمي أول ماشافته قالتلي: يعني بذمتج هالكعب حلو؟ أقولها: اي عاجبني من زمان. تقولي: ماعندج ذوق!
والله الكعب عاجبني بس مادري أمي شفيها عليه :p حسيته يناسب للطلعات والجمعات الخفيفة خصوصا لأن طول الهيلز متوسط.

Dolce & Gabbana Sunglasses 
من أهم الاشيا اللي كنت حاطتها في بالي هي نظارة شمسية، ومادري ليش هالسنة معلقة على نظارات دولشي :( والله دورت وايد وماعجبني شي، وهذا آخر خيار قدامي .. بس تبون الصج؟ من شريتها مالبستها إلا مرة! مادري ليش مب عاجبتني.
سعرها: قريب الـ 1500 درهم اماراتي.

Dolce & Gabbana Wallet 

اضطريت اخذها لأن شنطتي الجديدة جداً صغيرة وأحتاج بوك صغير مايثقل علي، ودورت في مليون محل وماحصلت إلا هي، حبيت إنها خفيف.

سعرها: قريب الـ 1500 درهم اماراتي.

بعد ماشفت الريفيوز على كيرلنق ايرون من جوسي ايبر في كل البلوقات وعند كل اليوتيوبرز، على طول حطيته في اللستة ودورته في دبي مول بكبره وماحصلته، عقب يوم رجعنا الفندق قررت أطلبه من النت وحطيته فالباسكت وقلت يوم نرجع الدوحة بطلبه .. اليوم الثاني، وأنا نازلة حق المطعم اللي أدمنته عليه هناك P.F Chang، شفت كشك صغير قدام صيدلية ابن سينا وانصدمت إنه موجود في دبي مول لأني يوم دورت عن أفرعهم في دبي مالقيت إلا في واحد ماذكر وين مكانه، وطبعاً ماترددت إني آخذه، لكن احترت أي واحد ست آخذ فيهم .. وفالنهاية رسيت على هذا بعد ماقالتلي إنه البست سلر

الست فيه:
١-  Clipless 19mm Curling Iron
 كيرلنق ايرون (فير) الحجم المتوسط
٢- Bright Pink Ceramic Hair Straightener
ستريتنر سيراميك
٣- Petite Flat Iron Pink Travel Size Straightener
ستريتنر صغير للسفر

سعره: بـ 700 درهم إماراتي.

هذا المحل الجميل اللي كل ماروح دبي لازم أمره :( ياخي مادري ليش أحبه بزيادة .. كنت رايحة وحاطة كم شي في بالي من قسم المكياج، وهذا اللي طلعت به.
*هالصورة فيها وايد أشيا، بنبدا من اليسار لليمين :p*

St. Tropez Tanning Essentials Self Tan Dark Bronzing Spray
أنا لوني من الله تاند، يعني ماحتاج شمس وحالة لكن تعرفون
سعره: قريب الـ 260 درهم اماراتي.

Hypnôse by Alber Elbaz Custom-Wear Volume Mascara
 مستحيل أحط مكياج يومي، أعراس، مناسبات أو أي شي بدون هالمسكرا. مع إني كنت حاطة في بالي مابشتري أي مسكرا جديدة لأن عندي فوق الخمسة ماستخدمتهم، لكن خذتها لأن عجبني شكلها الجديد وكنت أحتاجها لأن القديمة كانت قريب تخلص.
سعره: 190 درهم اماراتي.

Natural Brow Shaper & Hair Touch Up
مسكرا للحواجب، خذت منها ثنتين لأن حسب علمي ماعندنا بوبي براون في قطر، وخفت يخلص من عندي لأني أحب استخدمها بشكل يومي، خصوصا يوم ماكون في مزاج إني أرسم حواجبي.
سعره: الوحدة بـ 100 درهم اماراتي.

Mineralize Volcanic Ash-Exfoliator - MAC

سمعت عن هذا السكرب للوجه لكن مادري ليش ماحبيت اشتريه من قبل، يمكن لأن لونه مايساعد -شدخل؟ :p- 

بعد ماخذته، حسيت بالسكرب العدل على وجهي وحسيت إنه له مفعول قووي! بس العتب على ريحته :(

سعره: 28$ من النت 

 MAC Brush Cleanser 

قبل ماعرف هالشي الجميل، كنت استصعب فكرة غسل الفراشي، لكن بعد ماكتشفته حسيت بسهولة الشي

سعره: 15$ من النت

illamasqua Rich Liquid Foundation 

أول شي رحت لشانيل بعد ماسمعت الريفيو عنه، وقلت للي تبيع أبي فاونديشن فل كفرج وعطتني اللي أبيه، بعد ماخذت لي لفة ودخلت عند الامسكا مدحت لي الفاونديشن مالهم، ويوم حطيته على يدي حسيت بالفل كفرج .. أقولها: على ظمانتج؟ يعني أرجع الشانيل؟ تقولي: ايه شو؟ أكيد على ضمانتي! 

وخذته على ضمانتها وجربته مرة وحدة وماندمت، ويوم شافته أختي قالتلي: أصلا من زمان قلتله عنج بس شكلج نسيتي

سعره: 150 درهم اماراتي.

illamasqua Bronzing Duo

جابته لي وحدة من ربعي هدية وعشقته، برونزر مع هايلايتر .. شي جميل جميل جميل. 

سعره: 150 درهم اماراتي

 laura mercier soufflé body crème sampler collection

هذا أجمل شي شريته من دبي، آخ! أحس إني أعشقه وماقدر يمر يوم بدون ماستخدمه .. نعومته على الجسم وريحته اللي تقتل من جمالها خذت قلبي :( لا جد والله، أنصح كل وحدة يكون عندها هذا الشي الحلو.

سعره: 270 درهم اماراتي.

سمعت عن هذا المحل وايد، حتى بنات قطر يمدحونه لكن تصدقون يوم دخلته ماعرفت شاخذ منه :(

Bubble Bath: Japanese Cherry Blossom & Midnight Pomegranate 

خذت نوعين من الببلز حق الباث، واحد على ريحة الجيري والثاني على ريحة الرمان 

سعره: الوحدة بـ 55 درهم اماراتي

Wallflowers Fragrance Plug & Bulbs

شفت بنات عندهم هذا الشي وقلت راح أجربه، وكان عليه عرض أخذ واحد من الشي الصغير والثاني مجانا

سعره: كله مع بعض 55 درهم اماراتي.

أنا هالمحل عندي معاه قصة حب، وبدت القصة في دبي وكل ماروح لازم أمر على المحل.

خذت من عندهم كلكشن هالمرة، عكس المرة اللي طافت يوم كنت بس بجرب لو صج منتجاتهم حلوة

I love Juicy Shampoo

شامبو للشعر اللي فروته دهنية، الصراحة يوم جربته تحسفت شوي إني شريته .. بس يمكن لاني ماستخدمت عقبه بلسم.

سعره: 180 درهم اماراتي

Big Sea Salt Shampoo

صراحة نفس شعور اي لوف جوسي، ماحسيت إنه يناسب شعري، بس بجرب معاهم بلسم.

سعره: 135 درهم اماراتي. 

Rub Rub Rub 

سكرب للجسم، ياخي هذا الجمال كله .. هني بداية قصة عشقي مع لش! كان عندي من قبل وفاجأت نفسي يوم خلصته، لأني بالعادة ماتم على شي لين يخلص.. عجججيب! 

سعره: 100 درهم اماراتي.

Ro's Argan Body Conditioner 

انصحتني اللي تبيع أحطه بعد السكرب، وصج أحسه ينعم الجسم ويفيد بعد السكرب .. من الاشيا المفضلة

سعره: 185 درهم اماراتي

Lemony Flutter

للحين ماعرف شفايدته، قالتلي اللي تبيع أحطه على الكوع والركبة والاظافر وإنه فيه فيتامين سي وكنت أبيها تسكت عني قلتلها أوكي لكن للحين ماعرف فايدته، حد يعرف؟ 

سعره: 75 درهم اماراتي

Lip Scrub 

من الاشيا اللي خذتها لاني سمعت عنها

سعره: 60 درهم اماراتي

Body Butter

قد خذته من قبل لكن اللون الاسود، وكان الشاور ينقلب كله أسود مع اللون بس كان ينفع للجسم، يوم قلت للي تبيع، عطتني واحد نفسه لكن لون أبيض.

سعره: 70 درهم اماراتي.

يوم دخلت سيفورا كنت مستعجلة، واذا حد قالي شي من اللي يبيع اقوله اوكي بس عشان يسكت عني وفالنهاية طلعت نص اللي فالباسكت، هني بصف الاشيا لانه اغلبها معروفة -للاسف ماتذكر الاسعار، لكن طلع لي كل شي قريب الـ 2400 درهم اماراتي-:

Clarisonic Mia 2 لتنظيف الوجه مع الجل، بيوتي بلندر، رموش من هدى لشز، موسترايزر ونيكد بيسك بليت من اربان ديكي .. لولي وبوسي تنت + برايمر + هايلايتر + كريم يضاف مع البرايمر + rockstar & heaven blushers + ست لقطع متفرقة من بنفت .. وهدايا من لانكوم ماعرف لهم مع مسكرا هدية من بنفت. 

أول مرة أدخل فكتوريا سيكرت وماشتري وايد :( العادة آخذ كل البجامات اللي عندهم، بس من كثر ماعندي بجامات قلت خلاص ماباخذ هالمرة.. فـ بس خذت من عندهم: يوقا بانتس وصج مريحين نفس ما الكل يمدحهم، كفر ماستخدمته للحين، وبودرة فيها لمعة للجسم.

من فور ايفر ٢١ اللي كل مادخله احتار بسبب الكولكشن الكبير اللي عندهم وأطلع بأشيا مالها معنى، خذت تيشيرتات لتحت العبايا، ومشط لأن شكله عجبني وبوديات بالوان فاقعة مادري متى بستخدمها.

وهذا شنطة مكياج صغيرة حبيتها، بس ماحس إنها تشل وايد، يمكن تنفع لمكياج السفر الخفيف جداً بدون أي كريمات او عطور وغيره.

هذا كان من الاشيا اللي ابي اشتريها في دبي، صاير عندي ادمان للترينق سوت، واختي وصتني أجيبلها واحد بعد فـ أول ماشفت المحل في اماراتس مول على طول دخلته وخذت من عندهم. 

سعره: البانت مع الجاكيت، قريب الـ 1200 درهم اماراتي. -هو فوق الألف، بس ماذكر عدل-

هنا اشيا متنوعة، يعني خذنا من كل بستان زهرة :p

Inglot matte lipstick

شفتهم مرة عند وحدة من صديقاتي، وعجبني ثباته وانه مايطير .. خذت ثلاث الوان مختلفة: بني، عنابي، أحمر.

Evian minral water spray

كنت أدوره في الدوحة، واكتشفت انه ينباع في كل مكان بس انا مادري عنه، حلو لترطيب الويه

Vichy Gel & Toner 

خذته بعد مامدحته لي اللي تبيع انه يزيل الرؤوس السودا وإنه ممكن استخدم التونر عشان اشل المكياج فيه

Bioderma makeup remover 

سمعت عنه مدددح، وقررت اجربه مرة، ومن أول تجربه عجبني! لكن حاليا استخدم مناديل جونسون فيوم تخلص برجع له.

Heels Genus & two Scrubs - Soap & Glory

في آخر يوم حصلت كريم الرجل في بوتس، وسكرب سامبلز صغار المدور قد جربته وخذت منه صغير لاني حسيت كثرت من السكربز والثاني قلت بجربه.

La Roche-Posay Effaclar Duo

قالتلي اللي تبيع انه راح يزيل الحبوب الصغيرة في الوجه في أقل من ١٠ ايام، وبعد التجربة من اول يوم حسيت بفرق كبير وان الحبوب خفت، وايد ناس امدحوه لكن في ناس كان لهم بعض الاثار الجانبية -تختفي الحبوب في مكان، وتطلع في مكان ثاني- لكن الحمدلله أنا معاي تمام التمام.

وبكذا أكون انتهيت من مشترياتي من دبي، صارلي قريب الأسبوع أكتب البوست بس كل مرة اتكيسل أكمله، بتشوفون في بعض المقاطع كتبت عالسريع فلو عندكم اي استفسار ممكن تكتبون كومنت او تتواصلون معاي بالانستقرام/ اسك/ توتر.

في بعض المنتجات عجبتني جداً وبعضها كلش ماعجبتني، راح أكتب عنهم ريفيوز قريب بإذن الله.

*ماشاءلله، تبارك الله، لاقوة إلا بالله.