London: أجمل المناطق اللي زرتها في لندن

السلام عليكم ورحمة الله وبركاته

اليوم جايتكم بموضوع مختلف عن أغلب المواضيع اللي موجودة في مدونتي، وهو مثل ماحبيت أوصفه: دليل سياحي بسيط عن الأماكن الموجودة في لندن. هنا ماراح أذكر كل الأماكن، لأن لندن مدينة كبيرة وتختلف الأذواق لكن راح أذكر أشهر المناطق فيها اللي عجبتني مع بعض الصور من تصويري. ☃

هذا الموضوع بيتقسم لـ: بحطلكم بعض من أجمل مناطق لندن مع صور التقطتها على فترات مختلفة... وإن شاءلله لي بوست ثاني لكافيهات ومطاعم لندن الشهيرة (وإذا حابين ممكن اتكلم عن الفنادق).
*كل الصور من تصويري، ماعدا اللي كاتبة عندهم إنهم مب من تصويري .. وهذا بسبب إني اتعيجز آخذ الكيمرا الثقيلة معاي في كل مكان! :(

احنا بشكل عام، مانطلع خارج لندن والفترات اللي نروحها تكون في الشتا أو شهر 10، مرة بس في شهر 4 و مرة في الصيف (وللأسف مانلحق على الـThorpe Park) .. والصراحة لندن في الشتا تجنن! :( لكن العتب على الجو المتغير اللي يقلب واحنا لابسين كل الكبت من البرد :p.

لندن بالنسبة لي من أجمل المدن اللي زرتها، ولو رحتها 50 مرة بعد ماراح أشبع منها .. أصنفها من التوب عندي مع باريس وسويسرا ودبي! فيها كل شي: كافيهات، مطاعم، شوبنق، مشي، قصور .. وفوق هذا أغلب الوقت جوها حلو والناس يفتحون النفس. 

London Eye, London Bridge & Big Ben 

لندن آي، هذا المكان السياحي الجميل، يعتبر أهم معلم في لندن وتقريبا 90% من الناس يعرفونه ويوم يروحون لندن لازم يزورونه، لكن أنا بسبب خوفي من المرتفعات ماركبته إلا آخر مرة رحنا وبعد ماسحبوني معاهم بالغصب :p. 

في أعلى قمة ممكن تشوفون لندن بكبرها، من قصور واماكن تسوق وغيرها 

أسعار التذاكر العادية: للفرد: 19.95£، وللعائلة المكونة من أربع: 67.91£

في طريقكم للندن آي، أكيد راح تمرون على جسر لندن وبتشوفون ساعة البق بن الشهيرة، وانتو راكبين لندن آي بعد راح تشوفون أحلى فيو لساعة بق بن والجسر.

 

 Madame Tussauds 



متحف مدام تيسو يعتبر من أشهر متحاف الشمع في العالم، وسمي نسبة لمؤسسة مدام تيسو
الجميل في هذا المتحف إنه شغلهم محترف، يعني ماتصدقين إن الشخصيات اللي واقفة قدامج غير حقيقة
وحتى مع الكيمرا ودقة التصوير، تلاحظين إنهم مشتغلين باحترافية تامة على كل شخصية وبدقة عالية.
أسعار التذاكر العادية: للفرد 30.0£ والعائلة المكونة من أربع (طفلين وشخصين كبار) 111.60£

 

 

   

  

  

   

Buckingham Palace

هذا يعتبر قصر الملكة اللي تسكن فيه، وقريب منها جدا حديقة كبيرة اسمها قرين بارك 

القصر كبير وجميل جداً ماشاءلله، الله يرزقنا في الجنة يارب .. وهو يعتبر ممشى ومكان يتصورون فيه الناس مع نافورة في النص، انا ماقد دخلت القصر ومادري لو يصير ندخله أصلا ولا :p 

وبالعادة نروح للقرين بارك نتمشى فيها بعدين نروح للقصر وبعدها نتمشى لين نوصل لجسر لندن وصوب بيق بن، لأن كلهم قراب من بعض. 

  

  

Hyde Park

يحتاج اتكلم بعد هذا الاسم؟ أشهر من نار على علم .. الحديقة الجميلة فيها نهر يتكاثرون فيه البط كل سنة :p وفيه كم كوفي شوب وسناجب .. والجميل إن الحديقة جداً كبيرة وتكون على شارع البارك لين المشهور، وعندهم في الصيف أحلى اسكريم (اللي يجي فوقه قطعة فليك)، أما فالشتا فـ winter wonderland هي سبب عشقي الأبدي لهذي الحديقة، ونتر وندرلاند تكون في هايد بارك وقت الشتا وفيها ألعاب وأكل والجو جميل وتجنن :(

Harrods

هارودز الجميل، ملتقى الخليجين القطري -شرايكم فيني وانا افوشر فيه؟ :p- ياخي هذا الشي الجميل أحببه! فيه كوفي شوفات ومطاعم وأهم شي: شوبنق، محلات الهاي اند والماركات العالمية! من كثر ماحبه، عادي أروحه في السفرة قريب الخمس مرات. ♥︎

الصراحة ماكنت آخذ الكام معاي لداخل المجمع، لأن الكام ثقيلة علي وأكون بروحي لابسة ستين شي وشايلة شنطة ثقيلة فماعندي ولا صورة لداخل المحل.

Harvey Nichols 

هذا الثاني من أشهر المحلات الضخمة في لندن، في بعض الماركات للمكياج خصوصا ماتتواجد إلا فيه مثل: trish mcevoy، والمكان مرتب من داخل ويوفر كثير من الماركات العالمية، وأنا عن نفسي مازوره إلا مرة وحدة في روحتي للندن لأني أشوف إن هارودز يكفي وويوفي، إلا لو عندي شي معين أحتاجه منه أروحه.

*الصورة مب من تصويري*

Selfridges

يووه! عيب علي... توي اكتشفت إن ماعندي ولا صورة لسلفردجز مع إنه احنا دايماً نسكن في البارك لين (قريب من سلفرجز) وأكثر مكان أروحه هو هذا المتجر الكبير .. طبعاً هذا يعتبر من أشهر المحلات في لندن وموجود في الاكسفورد ستريت .. ومثل هارفي نيكلز وهارودز فيه شوبنق وأكلات ومطاعم!

*الصورة مب من تصويري*

Oxford Street

من أشهر الشوارع اللي في لندن، اكسفورد ستريت.. قريب من الهايد بارك (لو تمشون لنهاية الشارع وتلفون يسار بتشوفون الهايد بارك) وفي نصه يوجد سلفرجز اللي تكلمنا عنه قبل شوي .. فيه محلات مختلفة مثل زارا ومانقو وبري مارك وفور ايفر 21 وغيرها من المحلات الحلوة + فيه مطاعم الفاست فود مثل كي اف سي وماكدونالدز وفيه كشكات صغيرة تبيع أكل وبعضها يبيع هدايا تذكارية وأهمها جاكيت (آي لوف لندن).
أحب هالشارع وقت كرسمس، لأنهم يزينونه بالليتات ويصير منظره جداً حلوو!

Edgware Road 

شارع العرب مثل مايسمونه، يشتهر بطلته العربية خصوصا إنه فيه أكثر من ١٥ مطعم لبناني ومطاعم عراقية وايرانية وتركية وعندهم شيشة وأركيلة يعني تحسون نفسكم في لبنان مش لندن، وتعتبر أحياء هذا الشارع من أكثر الأحياء اللي سكانها عرب ويتحدثون باللغة العربية .. يعني مسافر للندن لكن مشتهي ريحة بلاده يمر على هذا الشارع.. مطاعه تجنن!

*الصورة مب من تصويري*

Bond Street

من أرقى شوارع لندن، والحلو في لندن إن شوارعهم كلها قريبة من بعض، يعني ماتحتاجون تاكسي إلا لو رحتو لأبعد شرق وتبون تروحون لأبعد غرب.. شارعين البوند الجديد والقديم، هم متصلين في بعض بس فجأة تكتشفين نفسج في البوند القديم/ الجديد! الحلو فيه إنه قريب من البارك لين (يعني هايد بارك) وأيضاً قريب من أكسفورد ستريت، وبعد قريب من البيكدلي.
البوند ستريت القديم والجديد كل محلاته من الهاي إند والمجوهرات، مثل شانيل وإل في وجيراف وفان كليف.

Sloane Street 

هذا الشارع مثل بوند ستريت، فيه المحلات الهاي اند وفيه مجوهرات وغيره .. ومحلاته جدا جدا كبيرة، ودايما إذا ماحصلتي القطعة اللي تبينها في هارودز/ سلفرجز ولا غيره بيقولون لج روحي لسلون ستريت أو البوند ستريت وأكيد بتحصلينه هناك، تقريباً أغلب القطع تتوفر عنده وخصوصاً قطع ال runway والفاشن شو.. أنا كنت أدور على شوز من فندي أول مانزل (اللي كعبه مكسر) وقالتلي اللي تبيع ماراح تحصلينه إلا هناك، فيوم رحت حصلته عندهم.

*الصورة مب من تصويري*

Covent Gards

هذا المكان اللي فيه Five guys *ألذ برقر كلته يا جماعة* فيه مطاعم قد شعر راسي، أي مطعم يخطر في بالكم بتلاقونه هناك -بالغت شوي- لا بس جد هو مكان للشوبنق والأكل والعروض اللي يقومون بها الناس، عروض سحرية وغيرها من الأشيا، المنطقة جداً حية وفيها كثير من الناس.. أنصحكم تزورونه والنصيحة الأجمل: ذوقو برقر فايف قايز.

Knightsbridge

  النايتسبريدج في لندن هي من أشهر وأرقى المناطق للسكن والتسوق، ويقع فيها هارودز .. المكان حلو للتمشي خصوصا في وقت الليل والحلو فيه أيضاً إنه قريب من الهايد بارك

*الصورة مب من تصويري*

Piccadilly

أحد أشهر ساحات وميادين لندن، يقع في جهة ويست اند في ويستمنستر في لندن، يتميز هذا الميدان إن فيه العديد من المحلات والأسواق والمطاعم الشهيرة، بالإضافة إلى المسارح والسينمات والمقاهي، المكان جداً جميل للمشي خصوصا في وقت الليل، لكن للي مايحبون الزحمة، أنصحهم يبتعدون عن هذا المكان.

*الصورة مب من تصويري*

King's Road

أنا هذا الشارع مازرته إلا مرة وحدة عشان محل الاسكريم، لكن أشوف في ناس يحبونه! هو بعيد شوي وياخذ وقت لين تروحونه بالسيارة بس أنا تعنيت له عشان اسكريم Amorino أو مثل مايسمونه: اسكريم بو وردة.
يعني لو رحتو هذا الشارع، عشان خاطري جربو هالاسكريم اللي أعشقه.

*الصورة مب من تصويري*

Thorpe Park 

هي ثيم بارك في لندن، فيها أجمل وأحلى الألعاب .. اللي يروح لندن من شهر مارس (ثلاثة) إلى شهر نوفمبر (احد عشر) لازم يمر على هالبارك الجميلة.. فيها كل الألعاب اللي تخطر على البال وجد جد حلوة.

تقدرون تشوفون الأوقات اللي تفتح فيها الحديقة لهذي السنة: هنا

*الصورة مب من تصويري*

Winterwonder Land

الجممال كُله... هذي اللي تخليني أعشق الشتا في لندن! تكلمت عنها فوق يوم قلت عن الهايد بارك! أحلى شي فيها الأكل المتنوع، كل شي يخطر على البال موجود في كشكات صغيرة متوزعة، ومع الجو الحلو والألعاب الكبيرة، تحسون إنكم ترجعون سنين ورا (هذا وأنا عمري توه عشرين :p) .. أنصحكم تزورونها إذا جيتو لندن وقت الشتا.
يعني لا تخافون، إذا راحت عليكم thrope park، عندكم ونتروندرلاند.

*الصورة مب من تصويري*

وبكذا أكون ختمت الأماكن الجميلة اللي أعشقها في لندن، وإن شاءلله مثل ماذكرت فوق لو حابين راح أتكلم عن أشهر كافيهات ومطاعم لندن، أو اتكلم عن الفنادق المشهورة والمميزة عندهم .. وبين فترة وفترة راح أتكلم عن دول مختلفة زرتها .. وفي بالي أيضاً إن شاءلله أحط لكم دليل سياحي مفصل عن كل مناطق دولة قطر. 

*ماشاءلله، تبارك الله، لاقوة إلا بالله