Review: L’Oreal Total Repair 5 Hair Mask | ريفيو: ماسك للشعر من لوريال

السلام عليكم ورحمة الله وبركاته

اليوم جايتلكم بريفيو كنت راح اتكلم عنه من زمان لكن سافرت وماحصل وقت أكتب فيه. 

أول شي بقولكم كيف تعرفت على البرودكت اللي بالصدفة جربته، قبل أسبوعين كنت حاجزة في الصالون تريتمنت لشعري، وأنا طبعي ماسوي تريتمنت إلا فالصالون ومتعودة على شغل صالون معين ماروح لغيره، والصراحة جدا فادني التريمنت عندهم! 

قبل الموعد بساعة حسيت إني متكيسلة ومالي خلق أروح الصالون، وبما إن هذا اليوم من الأسبوع مقرر لتريمنت الشعر. فبعد ماكنسلت الموعد رحت لصوب كريمات الشعر وخذت أول كريم شفته مع إني ماقد شفت عنه أي ريفيو قبل ومادري ليش كان عندي بس بعد ماستعملته حمدت ربي إني خذته، ودورت فالنت وشفت الريفوات عنه وكلهم متفقين معاي ويمدحونه. 

“بنصحكم بشي بعيد عن هالكريم، وهو إنكم تسون حمام زيت كل أسبوعين مرة لأنه صج يطول الشعر ومايخليه يتقصف ويكثفه.”

وهذا هو الجميل

L’Oreal Total Repair 5 Hair Mask 

من اسمه 5 repairs، يعني يعالج ٥ أشيا: 

1- Hair Fall، تساقط الشعر

2- Dryness، الجفاف

3- Roughness، الخشونة

4- Dullness، الشعر الباهت

5- Split Ends، نهاية الشعر المتفرقة

مكونات الماسك: Aqua, Water, Cetearyl Alcohol, Behrntrimonium Chloride, Glycerin, Cetyl Esters, Hydroxypropyltrimonim Hydrolyzed Wheat Protein, Dodocene, Phenoxethanol, Agrinine, Chelorhexidine Digluconate, Poloxamer 407, Serine, Citric Acid Etc

طريقة الاستخدام حسب ما مكتوب عالبرودكت: وزعيه بالتساوي على خصلات شعرك المغسول والمجفف بالمنشفة بالتركيز على الأطراف. اتركيه لدقيقتين أو ثلاث. يمكن إزالته بالماء بسهولة. 

أنا بصراحة ماستخدم هالطريقة، لإني أحس إنه يلبد الشعر ويخليه دهني أكثر فـ...

طريقة استخدامي له: تحطينه دقيقتين-ثلاث دقايق قبل ماتغسلين شعرج، وأنا أحط كمية متوسطة -أحس إذا كثرت منه راح يخلي شعري دهني أكثر ولازم آخذ شاور اليوم الثاني- بعدها تغسلين شعرج وتحطين شامبو طبيعي.

نوع شعري: شعري ناعم وفروته دهنية وحبته خفيفة، يعني لازم لازم أخذ شاور عالأقل كل يومين وأحياناً كل يوم، لكن أطرافه عادية، والحمدلله شعري أوكي لكن يتقصف بسرعة. 

*معلومة: أنا ماستخدم الكوندشنر ولا عمري استخدمته، لأني من استخدمه أحس شعري يلبد وأحتاج أغسله على طول.

النتيجة: الصراحة انصدمت بالنتيجة، بعد ماغسلت شعري نشفته عالسريع وطلع شعري كنه مستشور، ناعم وأطرافه تمام من أول مرة، والحلو إنه ماخلا الشعر دهني، وجد يوم بعد يوم حسيت إنه شعري تعدل من خلال عدة نواحي، وأنا استخدمه مرتين فالأسبوع.

سعره من النت: ٢٠٠ مل بـ 26.99$ 

أماكن تواجده: أتوقع في كل جمعية 

يبقى معاج لـ: قريب سنة وفي بعض المواقع يقولون يتم معاهم لسنتين.

من إيجابياته: 

١- مثل ماقلت يخلي الشعر جدا ناعم وملمسه يكون جميل بدون مايخليه دهني

٢- الشعر يكون متغذي ورطب 

٣- ماتحتاجين لكمية كبيرة كل مرة، فمابتحتاجين تشترينه أكثر من مرة للسنة أو سنتين.

٤- أجمل شي فيه إنه يخلي أطراف الشعر متماسكة

٥- استخدامه سهل، والفترة اللي تخلينها على الشعر ماتطول .. يعني حتى لو كنتي مستعجلة ممكن تستخدمينه وتخلينه بس دقيقة أو دقيقتين.

سلبيته الوحيدة بالنسبة لي: 

١- بالنسبة لي لو كثرت منه على الشعر يخليه دهني وناعم بزيادة لدرجة ماحبها -يعني يصير شعر فلبيني- 

*

صارلي أكثر من أسبوعين استخدمه، ولاحظت نتيجة جداً حلوة من أول مرة وأحس إني راح استمر عليه 

ويوم بحثت عنه في النت لاحظت نوعين واحد ذهبي والثاني أحمر، واللي عندي مثل الصورة هو الأحمر، فأنصحكم فيه وإن شاءلله تكون النتيجة مرضية. 

*ماشاءلله، تبارك الله، لاقوة إلا بالله

*