Review: Lush Products | ريفيو منتجات لش

السلام عليكم ورحمة الله وبركاته

اليوم راح اتكلم عن منتجات لش اللي استخدمتها وجربتها خلال الفترة الأخيرة أو من زمان، المنتجات بعضها للشعر وبعضها للجسم أو الشفايف، يعني متنوعين. وهنا راح أكتب رأيي بصراحة، لأن في كم منتج امدحوه لكن أنا ماناسبني، ومع إني أحب لش وايد، لكن ماراح أمدح شي ماعجبني! 

المنتجات اللي راح أتكلم عنها في هذا البوست:

1- Ro's Argan | Body Conditioner

2- Rub Rub Rub | Body Scrub

3- I Love Juicy | Shampoo

4- Big Sea Salt | Shampoo

5- Mint Julips | Lip Scrub

6- Lemony Flutter

7- Body Butter

Ro's Argan | Body Conditioner 

ليش محد قالي عن هذا الشي من قبل؟ :( أنا من قريب سنة استخدم البودي سكرب (بتكلم عنه بعد شوي) ويوم خلص، قلت راح أشتريه يوم سافرت دبي (ممكن تشوفون اللي شريته في دبي هنا)، وأنا في المحل قالتلي اللي تبيع: إنه من التوب سلر وإن الناس يوم يشترون البودي سكرب يشترون هذا معاه، وماراح أندم لو خذته، ومن هالكلام!

وتبون الصج؟ أنا أصدق إن منتجات لش ماراح أندم يوم أشتريها لجودتها، أغلبها طبعا مب كلها. :p وحمدت ربي ألف مرة إني خذته!

عن المنتج: 

كوندشنر أو بلسم بس للجسم، يعني شغله مثل بلسم الشعر لكن للجسم، يرطب الجسم ويعطيه نعومة.

طريقة استخدامي له:

مبين في الصورة إنه مثل الكريم، تحطينه على جسمج بعد ماتخلصين كل الكريمات اللي تستخدمينها وقت الشاور، وتخلينه على الجسم دقيقة/ دقيقتين بالكثير وعقب تغسلين جسمج!

رأيي فيه:

من أجمل المنتجات اللي خذتها، لأني أحب نعومته وأنا أحطه على جسمي والترطيب القوي بعد ماغسله، وريحته جداً جميلة لكن ماهي قوية وايد.

سعره: خذته من الإمارات بـ 185 درهم إماراتي.

برجع اشتريه: اي، مرة ومرتين وثلاث ومليون مرة.

تقييمي: 10/10

Rub Rub Rub | Body Scrub

هذا أول منتج جربته من لش! يعني بداية غرامي للمحل.

قبل سنة ونص تقريباً وحدة من صديقاتي وصتني أجيبلها من دبي بعض المنتجات من عندهم (لأن المحل اللي في قطر كان مسكر للصيانة)، وأنا طالعة امسكتني اللي تبيع وإلا تجربين شي من عندنا، قلتلها إني ماعرف الماركة وماحب أجرب من محلات الصوابين اللي جيه (سوري لش ماكنت أعرف إنك محل عجيب :p). قالتلي شوفي وجربي وعلى ضمانتي وبلا بلا. وقدرت علي وخذته.

عن المنتج:

عبارة عن سكرب أو مقشر للجسم مستخلص من أملاح البحر، وترى جد بتحسون بريحة البحر وإنتو تستخدمونه :p.

طريقة استخدامي له:

بعد ماغسل جسمي، بيدي آخذ كمية وأحطه على المكان اللي أبي أسويله سكرب وبالليفة أمسحه بشويش، وأحياناً بيدي أمسحه، وعقبها أغسله بالماي.

رأيي فيه:

المنتج جداً جميل، ومن السكربات الخفيفة اللي تعجبني، هو من البست سلرز عند المحل لكن ما أحس تقشيره قوي وايد بس ينفع للاستخدام اليومي.

سعره: 100 درهم إماراتي.

برجع اشتريه: ممكن، هذي ثاني علبة له وأنا أؤمن إني أملاح البحر تساعد على إزالة الجلد الميت، لكن ممكن اتملل منه وأحب أغير.

تقييمي: 8/10

Big Sea Salt | Shampoo

سمعت عن هذا الشامبو من البلوقرز وبعضهم امدحوه، يعني ماشفت إنه منتشر وايد لكن حبيت فكرة الشامبو إنها غريب، ويوم رجعت البيت وفتحته حبيته أكثر لكن يوم جربته تغيرت نظرتي له.

عن المنتج: 

شامبو للشعر يقال إنه يلمع الشعر وينعمه ويعطيه حجم وحيوية، وهو عبارة عن خليط أغلب قطع كبيرة من أملاح البحر وفيه زيت جوز الهند.

طريقة استخدامي له:

الصراحة؟ توهقت يوم استخدمته لأنه مايطلع رغوة كلش فماعرفت الكمية الكافية اللي أحطها، أول مرتين حطيته على الشعر كله عقب عاملته مثل الشامبو وبعدها غسلت شعري طبيعي، لكن بعد كم مرة قررت إني أحطه بس عالفروة وكنت أفركه في فروة الرأس عقب استخدم شامبو ثاني لاني ماحس إني غسلت شعري عدل.

رأيي فيه: 

ماعجبني المنتج كلش، مادري هو الخلل في طريقة استخدامي له أو لأني أحب الرغوة تطلع عشان أصدق إن شعري تنظف عدل. وأيضاً عانيت شوي مع قطع الأملاح الكبيرة اللي تعلق في الشعر وفي أطرافه أحياناً.

ولاحظت بعد ماغسلت شعري أول مرة إن الشعر يصير مثل السلك، ماعرف شلون أوصفلكم بس تعرفون امسحه عليه يكون مثل الزجاج (وصف فاشل) لكن شعور ماحبيته، بس أول ماينشف يرجع طبيعي.

همسة: أنا ماستخدم البلسم كلش، فالمنتج يمكن يحتاج لبلسم بعده عشان يبان مفعوله.

سعره: 135 درهم إماراتي.

برجع أشتريه: لا.

تقييمي: 5/10 (الخمسة لأني حسيته ينظف فروة الراس بالأملاح)

I Love Juicy | Shampoo

هذا على كثر المدح اللي سمعت عنه كان في اللست للأشيا اللي أحتاج أشتريه :p بما إن اللي امدحوه قالو إنه بيرفكت للشعر اللي فروته دهنية وأطرافه جافة فقلت يا سلام هذا يناسبني.

عن المنتج:

شامبو مثل ماقلتلكم ينفع للي فروته دهنية وأطراف شعره جافة.

رأيي فيه:

ماعجبني إطلاقا، كلش، نفس شعور الـ Big Sea Salt، أحس إن شعري يتحول زجاج، ولكن أيضاً اقولكم يمكن الشامبو يحتاج لبلسم عشان تبان نتيجته، لكن عن نفسي اقتنعت إن شامبو لوريال هو الوحيد اللي يفيد شعري.

سعره: 180 درهم إماراتي.

راح أرجع اشتريه: لا.

تقييمي: 3/10

Lemony Flutter 

وأنا جاية بدفع جا على بالي أسألها لو عندهم منتجات تنفع للأظافر، وقالتلي: أكيد، هايدا أفضل منتج عننا للأظافر.

قلتلها زين عز الطلب، دام كل منتجاتكم زينة أكيد هذا بيفيد أظافري بعد.

عن المنتج:

يعتبر أثقل نوع من أنواع الكريمات لدى لش، وهو كريم ليمون يساعد لتنعيم الجلد وأيضاً لإزالة الجلد الميت ويغذي الأظافر

طريقة استخدامي له:

على رأيي اللي تبيع إنه ممكن أيضاً استخدمه لأي منطقة فيها جلد ميت وجافة مثل الكوع أو الركبة، وأنا كنت أحط مسحة خفيفة على أظافر ومسحة أكبر على كوعي.

رأيي فيه:

ماحسيت بفرق كبير يمكن شوي الجلد اللي حول أظافري تحسن بس يمكن مثل ماتشوفون ماستخدمته وايد لأنه مزعج! يعني لو أحطه على ظفري أحس إني حاطة فازلين لكن عالكوع عادي مايلعوز!

سعره: 75 درهم إماراتي

راح أرجع أشتريه: لا. لأني ماحس إنه يخلص بسرعة، وماشفت فوائد سريعة لكن راح أجربه أكثر وأشوف.

تقييمي: 5/10.

Mint Julips | Lip Scrub

هذا المنتج الحلو اللي سمعت عنه وايد وقلت لازم أشتريه وأصلا أنا ماقد جربت سكرب للشفايف من قبل وحبيت آخذ شي يكون من أفضل الأشيا عشان استمر على عادة السكرب.

عن المنتج:

هذا المنتج صنع خصيصاً لتقشير الشفايف الجافة أو العادية، للاستخدام اليومي وهو عبارة عن سكر مع النعناع.

طريقة استخدامي له:

أول شي آخذ كمية خفيفة بصبعي من السكرب وأحطه على شفايفي وأدلكه بالخفيف لمدة دقيقة وبعدها أغسل شفايفي، ومثل ما انتو شايفين إني حاطة فازلين الشفايف، ليش؟ لأني بعد ماستخدم السكرب أحط واحد من هالاثنين عشان يعطيه ترطيب أكبر.

رأيي فيه:

أول مرة استخدمته ماعرفتله عدل، لأنه كما ذكرت هذي أول مرة استخدم سكرب شفايف وماحسيت بفرق! بس ثاني مرة حبيته وايييد وحسيت بترطيبه العالي والجميل فيه لو كلتي حبة بالغلط عادي لأنه ينأكل مثل مامكتوب في الموقع :p ومع الفازلين حسيت بشفايفي تصير ناعمة ويخف الجفاف اللي فيها، وأيضاً ريحته حلوة وتعطي انتعاش.

سعره: 60 درهم إماراتي.

راح أرجع اشتريه: اي، وراح أجرب نكهات ثانية.

تقييمي: 8/10

Aqua Mirabilis | Body Butter

وأخيراً هذا الجميل اللي مادري ليش الصورة طالعة صفرا معاه، هذا الله يطول بعمركم وصتني عليه رفيجتي وقالتلي أجيبلها زبدة للجسم (بودي بتر) الأسود والأبيض، وكانت أول مرة أعرف فيها لش وقلت راح آخذ لي معاها وأجرب. وعشقت هذا المنتج وحبيته لكن في المرة اللي طافت ماعطوني هذا البوكس المعلب وحطولي إياه في كيس صغير وكان يلعوز بس مع البوكس تحسن الموضوع.

عن المنتج:

زبدة للجسم تعطي نعومة وترطيب عالي للجسم.

طريقة استخدامي له:

أحس إني استخدمه غلط(بس تعجبني النتائج)، لأني أعامله معاملة الصابون لكن بطريقة أقوى يعني وأنا في الشاور أمشه على جسمي وعقب أغسله (لكن حاسبو لأنه يذوب تحت الماي).

نصيحة: اللون الأسود يوصخ الحمام ويصبغ في كل مكان، فأنصحكم بالأبيض أحسن.

رأيي فيه:

حبيته، هذي ثالث قطعة استخدمها وأحس بنعومته على الجسم لكن لو استخدميته بقوة أكثر ممكن يشمخ الجسم لأنه شوي خشن.

راح أرجع اشتريه: نعم.

سعره: 70 درهم إماراتي.

تقييمي: 7/10

وهذا تقييمي لجميع منتجات لش اللي استخدمتها، واللي تعرف منتجات 10/10 أتمنى تنصحني فيها لأني حبيت منتجاتهم. ولأي استفسار أنا في الخدمة.

*ماشاءلله، تبارك الله، لا قوة إلا بالله.

مع السلامة.