Haul: Kenbo, Clinique, Mavala, Revlon & Others.

السلام عليكم ورحمة الله وبركاته

اليوم جايتكم بمجموعة من الأشياء الجديدة اللي شريتها في آخر أسبوع، مع إني ماكنت أحتاج إلا أول منتج لكن حبيت أجرب باقي الأشيا بعد مامدحوهم لي! 

أول مجموعة اللي من كنبو وكلينك خذتهم قبل أسبوع، أما الباقيين خذتهم اليوم بعد ماكتشفت في آخر لحظة إن ماعندي فستان جديد لخطوبة صديقتي، فرحت العصر لمجمع السلام وخذت لي فستان بسيط لكن ينفع لحفلة الخطوبة.. وأنا طالعة من السلام مريت على محل في المول اسمه Karisma، وبعد ماسمعت مدح كثير عن بعض من ماركات الدرق ستور قررت إني أجرب بعضهم، وبراويكم المنتجات اللي اعجبتني. 

Clinique Even Better Clinical Dark Spot Corrector 

بشرتي الحساسة الدلوعة اللي تتحسس من كل شي وكل ماحط عليها شي تبقع صايرة تقهرني لأنه صاير فيها بقع غامقة شوي من الحبوب/ الكريمات وغيرها .. وماخليت كريم ماجربته عشان يروح لكن مافاد، لدرجة إني حطيت الميبو اللي بعض الناس مايحبون يحطونه على يدهم لأنه ريحته مب حلوة بس قلت معليه بجرب :( لين سمعت عن هذا المنتج وقلت بجربه، والصراحة صارلي ٣ أيام أجربه وحسيت إن البقع خفت وعشقته، لكن راح أداوم عليه شهر وبعدها راح أكتب ريفيو مفصل عنه. 

سعره للحجم الصغير: قريب الـ 360 ريال قطري 

Kenbo Sensai Silky Purifying Cleansing Milk - Step 1

Kenbo Sensai Silky Purifying Mud Soap (Wash & Mask) - Step 2

الخطوة الأولى: هي عبارة عن منظف للمكياج أو منظف للوجه بعد اليوم حتى لو ماحطيتي مكياج لأن يكفي شقد يتعرض الوجه للأتربة وغيرها، فحلو تحطينه على ويهج وتحسين بنظافة. 

الخطوة الثانية: في عدة خيارات ممكن تستخدمينها لكن أنا سمعت من بعض البلوقات إن هذا أفضل نوع وهو عبارة عن صابونة سائلة للوجه لكن تكون ثقيلة جداً، وتنفع ماسك أو غسول.. أنا مرات استخدمها جيه ومرات جيه. 

أسعارهم: بين الـ 200-300 ريال قطري، ماتذكر كلش والله :(

Eyelash Curler 

أصدمكم؟ ماقد جربت هذا الشي من قبل، مادري من قالي إنه يكسر الرموش ومن يومها ماتجرأ أشتريه، لكن اليوم شفته وقلت راح أخليه عندي واستعمه للمناسبات وإن شاءلله ماراح يكسر رموشي. 

سعره: ٢٥ ريال قطري

Manicures  

مجموعة مناكير من ريفلون وماركات ثانية، وآخر واحد عاليمين مانكير من بورجوا تحطينه كطبقة فوق المناكير ويصير المناكير مات (على حساب كلام اللي تبيع). 

أسعارهم: تتراوح بين 30-40 ريال قطري.

Revlon & Bourjois 

من اليمين خذت آي لاينر جل لون أسود من ريفلون، حسيت خاطري أجربه لأن شكله يشجع .. والاثنين في النص شدو natural والثاني أغمج شوي من بورجوا وآخر شي قلم روج جمبو من ريفلون سمعت مدح عنه.

أسعارهم: الاي لاينر - 60 ريال قطري، الشدو 73 ريال قطري لكل واحد، الروج الجمبو 59 ريال قطري.

Mavala's Collection

ماتتخيلون الفرحة اللي في قلبي يوم شفت هذي الماركة موجودة في المحل، يمكن من بعدها عشقت المحل؟ :( أنا ماعندي منتجات عناية بالأظافر كلش لأني مثل ماذكرت في انستقرامي عنايتي الشهرية تكون بداكير ومناكير في الصالون فقط، لكنل سمعت كثير عن هالماركة وقلت بجربها وأكثر شي حبيته هو الدائرتين الصغار وهم عباره عن مزيل مناكير لكن على شكل قطنه صغيرة، شي جميل! وباقي الاشيا: زيت للأظافر، مبيض الأظافر، نمو الأظافر، يشيل الجلد الميت حول الظفر، مقوي الأظافر، مزيل الأظافر الأزرق، والتقنية 3 لوضع المناكير ليجف أسرع. --إن شاءلله لي ريفيو عنه قريب بعد ماستعملهم. 

أسعارهم: تتراوح أسعارهم بين 20-60 ريال قطري. 

A Gift from Revlon 

هذي المنتجات جاتني هدية بعد ماشريت بسعر معين، وهي عبارة عن مناكير ريفلون بلون برتقالي، وكونسيلر (كلش ماينفعني لأني حنطاوية وهم معطيني أفتح درجة) وروج سائل. حبيت المجموعة خصوصاً إن معاها مناكير وأنا دايماً أسمع عن مناكير ريفلون إنها من أفضل أنواع المناكير.

وبكذا أكون خلصت مشترياتي الجديدة اللي خذتها في هالأسبوع، واللي عندها أي استفسار عن المنتجات أو أسعارهم ممكن تتواصل معاي عالآسك/ انستقرام/ تويتر. 

*ماشاءلله، تبارك الله، لا قوة إلا بالله.

مع السلامة.