سلسلة مفضلات سنة ٢٠١٣ | My Favorite Beauty Products of 2013

السلام عليكم ورحمة الله وبركاته

يا إني أجيكم بـ مليون بوست ورا بعض ولا إني أسكت لمدة أسبوعين ماكتب شي، كالعادة في هذي السلسلة راح أتكلم عن مجموعة من البرودكتس/ المنتجات اللي استخدمتها أغلب سنة 2013 وبعضها للحين استخدمها. وترى الطاولة نظيفة بس مع التصوير والإضاءة مادري ليش طالعة جيه.
*تنبيه بسيط: ترى أنواع البشرة تختلف، يمكن اللي يناسب بشرتي مايناسب بشرتكم! فجربوا البرودكتس قبل ماتشترونها. 

وراح أقسم السلسلة إلى مجموعتين:
١- ميك اب
٢- عطور ومناكير وكريمات ومنتجات متنوعة

راح أتكلم في هذي السلسلة عن المكياج/ ميك آب، وراح أقسمهم لـ *ياحبي للتقسيم*:
١- الفاونديشن والبرايمر
٢- البلاشر والكونتور
٣- مكياج العيون
٤- الأرواج

الفاونديشن والبرايمر

١- من أفضل البرايمرز اللي استخدمتهم هو Benefit Primer.
قد جربت برايمر توم فورد لكن كنت من استخدمه يحرق وجهي فماقدرت استخدمه أكثر، ماكنت أستخدمه للمكياج اليومي لكن كنت أحرص إني أحطه وقت العزايم والطلعات لأن الميك آب يكون أثقل وقتها فتكسر خاطري بشرتي.



٢- أفضل فاونديشن استخدمته وما خرب بشرتي: Kenbo Cream Foundation
حضرتي ماثبت على نوع واحد من الميك اب وهذا اللي مدمر وجهي ومتعبه على كثر الأشيا اللي استخدمها والكريمات عشان يتحسن! لكن العتب على اللي يغيرون الفاونديشن كل شهرين. في بعض الناس انتقدوا هذا المنتج لكن أغلب اللي أعرفهم يعشقون هذا الفاونديشن.



٣- أفضل وأجمل وأحلى كونسيلر: Dior Concealer
واللي يقول إنه مب زين ماعنده سالفة. جمال هالكونسيلر مب طبيعي، أعشقه عشق وماستغني عنه ومن أول ماتعلمت أحط ميك اب وأنا استخدم هذا الكونسيلر العجيب. يغطي كل عيوب البشرة وفيه منه درجات تناسب كل الألوان.

البلاشر والكنتور

١- أجمل إضاءة هي MAC Soft and Gentle Mineralise Skinfinish
هالإضاءة هي أكثر إضاءة منتشرة بين كل البنات والبلوقرز الأجانب والعرب، تحسون كولكشن الميك اب مايكتمل إلا بها.تعطي إضافة جميلة للميك آب وماتخلى عنها أبداً للسهرات والعزايم.

٢- وهل يعلى على بلشرات ماك؟ Desert Rose & Coppertone Blushes.
بعد عشقي للمسكرا والأرواج، يجي عشقي للبلشرات، ومن كثر ماشتري بدون ماعرف اللي عندي! عادي أرجع البيت وأحصل اثنين نفس الشي :( لكن على كثر البلشرز اللي عندي، مافي أجمل من بلشرز ماك *عندي بلشرات جديدة قيد التجربة لكن من اللي استخدمتهم قبل، ماك أحسن شي*أولاً: ديسرت روز لونه بنك ويناسب جداً للجمعات، أحبه جدا جدا.ثانياً: البلشر القريب من لون البشرة هو كوبرتون، يالله هالبلشر يعطي قصة للوجه لكن مايبين عدل. ينفع للمكياج اليومي الخفيف.



٣- البرونزر المفضل: Dolce and Gabbana, the bronzer bronze
هذا البرونز جميل ولونه غامق وايد، يعني من مرة وحدة تحطين الفرشاة عليه يثبت اللون لكن حاسبو مايناسب جميع البشرات، يعني انا لوني مايل للتان فيكون مناسبني بس يوم حطيته لأمي وهي بشرتها بيضا كلش ماناسبها وطلع غامق عليها. بس للي بشرتهم مايلة للتان بيناسبهم وبيعجبهم وبيعشقون ويطيحون في غرامه.



٤- برونزر ثاني أعشقه: Guerlain Terracotta Light Sheer Bronzing Powder
في منه رقمين: رقم واحد للـ Blonde (شقر) ورقم اثنين لـ Brunette (احنا)أنا استخدم الرقم الثاني طبعاً، وماستخدمه كبلشر، استخدمه لكل وجهي!بعد ماخلص من الفاونديشن السائل والفاونديشن البودرة والكونسيلر وقبل ما أحط البلشر.. بالفرشاة أوزع شوي من هالبودر على وجهي وفي ناس يستخدمونه لـ الكونتور وفي ناس يستخدمونه كبلشر، يناسب كل شي هذا المنتج الجميل* ما أنصح اللي بشرتهم بيضا وايد إنهم يسوون هالشي، لأن بيطلع فيه اختلاف كبير بين لون الجسم والبشرة.



٥- فرشاتي المفضلة للكونتور: illamasque Brush
أول ماشفت هذي الفرشاة عند أختي، قلت بس! هذي الفرشاة اللي أحتاجها للكونتورالفرشاة قوية ومن أول مرة يظبط الكونتور، وأنا صارلي سنة أدور شي ينفع ومن أول مرةتعبت لين ماحصلتها لأنها ماكانت موجودة في الدوحة، بس حصلتها في دبي.



مكياج العيون

في هذا القسم ماراح أتكلم عن الآي شدو وايد، لأني للحين ماتمكنت منه عدل.لكن راح اتكلم أكثر عن الآي لاينر والمسكرا وغيرها.

١- المسكرا المفضلة لكل الناس تقريباً، Lancome Mascara
من عرفت المكياج، وأنا استخدم هذي المسكرا.. وماسمعت حد مايمدحها!تنفع للمبتدأين والمتطورين والخبيرين وكل فئات البنات اللي يستخدمون المكياجأنصح فيها وبشدة، وماتخرب الرموش ولا حتى تخليهم يتكتلون. أعطيها ١٠٠٠٠ من عشرة.



٢- مسكرا ثانية أحبها وتخلي الرموش طويلة Bassam Fattouh
تدرون إني ماقد سمعت عنها من قبل؟ لكن مرة كنت حابة أجدد مسكرتي وأشتري شي يطول رموشيوانصحتني اللي تبيع بهذي المسكرا، وقلت في قلبي ليش ماجربها مع المدح اللي مدحته المرةوصج صج ماندمت إني فكرت أشتريها، عجججيبة!أنا استخدمها كطبقة ثانية فوق مسكرا لانكوم، واستعملها استعمال يومي ويناسب العزايم بعد



٣- أفضل آي لاينر Lancome Eyeliner
تحسون إني أعشق لانكوم؟ ترى جد ماعمري خذت منهم شي وندمت عليهوهذا الاي لاينر خذته فوق الـ ٣ مرات من كثر ماستخدمه، مايتعب ولا يخرب المكياج واستخدامه سهل سهل سهلوأجمل شي إنه ضعيف يعني ممكن نرسم الاي لاينر ضعيف وممكن نعرضه لو حبيناماجربت ولا بجرب غيره. 

٤- فرشاة الآي شدو، Mac 239 eyeshadow brush
مثل ماقلت إني مبتدأة في الاي شدو ولا عندي فكرة كبيرة عن كيف أحط اي شدو للسهرات والعزايم لكن أكتفي إني أحط شي خفيف للجمعات ومن أكثر الفرش اللي نصحوني فيها هي فرشاة ماك، والصراحة ماندمت إني خذتها



٥- وهل يخفى القمر؟ Naked Palette 1 & 3
عاد أنا لوسة شوي، وأحب إني أجمع الميك آب عندي.. قلتلكم إني ماعرف استخدم الآي شدو عدل لكن مادري ليش خذت اثنين من نيكد، عاد قلت إن الألوان مختلفة من الأول والثاني وأكيد إني بحتاج واحد منهم فالمستقبل، واللحين أفكر اشتري نيكد ٢ بعد :( أنا الصراحة عشقت الأول واستخدامه جميل للأيام العادية والجمعات الخفيفة، الثالث مرة أختي حطت لي إياه لعزيمة وكان جميل بعد. وأختي الخبيرة في الآي شدو ماشاءلله دايماً تقول: دام عندي مجموعة نيكد ١ و٢ و٣ أقدر أحط أي نوع من أنواع الآي شدو. فـ مدام أختي قالت إنه المجموعة زينه، فأنا أثق في خبرتها. 





الأرواج
اللي مدمن أرواج يرفع ايدوا.. *فيس رافع يدينه الثنتين*

١- روج من Dolce & Gabbana
*حاولت أطلع رقمه لكن ماعرفت، مكتوب Perfection 50 لكن يوم دورت فالنت مافي شي*في كل سفرة للندن ولا دبي كنت آخذ أكبر مجموعة من أرواج دولشي لأني ماكنت أحصلهم في الدوحةلكن أخيراً حصلته في باريس قالري اللي في لاقونا، أول ماشفته حسيت إني مكتشفة كنزهذا الروج هو المفضل عندي للسهرات والعزايم .. خصوصاً في الشتا لأنه ماشي على الترند



٢- أرواج توم فورد، Tom Ford Crimson Noir 11
يحتاج أتكلم وأقول عن هالأرواج؟ طبعاً طبعاً لا.ياخي من أفضل الأرواج اللي استخدمها، والألوان اللي عندهم جميييلة! عندي نص الكولكشن تقريباًأحب هذا اللون للمناسبات والجمعات الكبيرة، يثبت ومايقوم كلش.



٣- روج بني، Sensai Vibrant Cream Color 09 Lipstick
أنا أعشق الأرواج اللي لونها يناسب كل مكان، مثل هذا الروجيناسب الجامعة والطلعات والجمعات والمناسبات وكل مكان.هذا الروج خذته بالصدفة بعد ماشفته عند وحدة من أقاربي.



٤- روج بنك فاتح، Giorgio Armani Ecstasy 501 Lipstick
مادري ليش كل شي مش موجود فالدوحة :( أنا كنت أسمع عن أرواج ارماني لكن ماجربتهم لاني ماحصلتهم في قطر *اللي يعرف مكان يبيع أرواج ارماني يخبرني بليز*هذا الروج خذته من لندن، وماستخدمه إلا كطبقة ثانية (يعني أخلطه) لكنه جميل بعد لو بتستخدمينه بروحه .. يعطي لون حلووو وزاهي وينفع لفترة الصيف 

٥- أرواج ماك، وفي أجمل وأفضل منها؟ Mac Lipsticks
طبعاً ماراح أحط روج واحد لأن أرواج ماك كلها عبارة عن جمال في علبة سودااللي ماعنده، أنصحه نصيحة مجرب إنه ياخذ شي من عندهم.. لأن أرواجهم تعتبر من التوب توب توب توب.



وبس والله، هذي كانت مجموعة البرودكتس المفضلة لعام ٢٠١٣.أدري إنها لستة طويلة .. لكن لأنها مجموعة سنة كاملة فبعضها يناسب الصيف وبعضها الشتاوإن شاءلله لي بوست جديد لتكملة السلسلة مع العطور والكريمات وغيرهم.

*ماشاءلله، تبارك الله، لا قوة إلا بالله.
سي يو سون.